C/rashiid Janan oo jawaabay ka bixiyey hadalka reer Mandhera oo ahaa inuu ka baxo magaaladooda

February 10, 2020 (Awdinle Online) – Wasiirka amniga Jubaland Cabdirashiid Xasan Cabdinuur Janan ayaa sheegay in uusan ku sugneyn magaalada Mandhera ee dalka Kenya, balse uu joogo magaalada Beled-Xaawo ee gobolka Gedo.

Cabdirashiid Janan oo u waramay laanta afka Soomaaliga ee VOA ayaa sheegay in isaga iyo ciidamo uu hoggaaminayo ay dhinac ka joogaan magaalada Beled-Xaawo, oo ay ku sugan yihiin ciidamadii dowladda federaalka ay dhawaan geysay degmooyinka gobolka Gedo.

Wasiir Janan ayaa sidoo kale sheegay inaysan wax dhibaato ah ku jirin inuu tago dalka Kenya markii uu doonana uu tagi doono xataa magaalada caasimadda ah ee Nairobi.

C/rashiid Janan ayaa carrabka ku adkeeyay in uusan joogin dalka Kenya ee uu ku suganyahay gudaha Soomaaliya, gaar ahaan degmada Beled-Xaawo, sidoo kale waxa uu sheegay in uusan doonayn in dowladaha deriska ah ee Soomaaliya iyo Kenya ay madaxiisa iskula dhacaan, khilaafna uu ka dhex abuuro.

Ugu dambeyntii wasiir Janan waxa uu sheegay in haatan ay isku meel ku sugan yihiin madaxweyne ku xigeenka Jubbaland Maxamuud Sayid Aadan iyo saraakiil dhowr ah oo reer Jubbland ah, hadafkooduna uu yahay in ay soo ceshadaan gacan ku heynta degmooyinka iyo deegaanada gobolka Gedo ee dowladdu kala wareegtay.

Hadalka wasiir Janan ayaa ku soo aadaya iyadoo xildhibaanada ku matala dowladda dhexe ee Kenya iyo mas’uuliyiinta kale oo ka soo jeeda gobolka Mandhera ay ugu baaqeen dawladda Kenya in ay hubka ka dhigto ama dalka ka saarto Cabdirashiid Janan iyo ciidamadiisa.