Hoggaamiyaha Xisbiga Wadajir” Xasuuqii ka dhacay Dhuusamareeb wuxuu ahaa danbi dagaal”

February  29, 2020 (Awdinle Online) –Cabdiraxmaan Cabdishakuur Warsame, Hogaamiyaha xisbiga  Mucaaradka ah ee Wadajir, ayaa dowladda ku eedeeyay in hubkii ciidanka Gaashaan ee loogu tala galay in lagula dagaallamo Al-Shabaab gala Hoteellada in dowladda dhexe ay geysay Magaalada Dhuusamareeb.

Waxaa uu sheegay in ay tahay nasiib daro weyn in maanta hubkii Al-Shabaab loogu tala galay in lagu dagaallamo dowladda ku weerarto Ahlusunna.

Halkaan ka aqriso Qoraalka hoggaamiyaha Wadajir..

Waxaa ilo xog-ogaal ah ii xaqiijiyeen in shalay galab dawlada federaalka ah Dhuusamareeb ka dejisay hubkii ciidan ka Gaashaan lahaayeen ee loogu tala galay in Alshabaab looga saaro Hoteelada ay qabsadaan. Waa hub derbiyada duleeliya, laaguna tala galay in meeshii lagu rido aanay suntiisa cidna ku noolaan, wuxuuna gubayaa qofkii uu gaaro ama ku ag dhaco.

Hubkaas iyo wiilashii ciidanka Gaashaan oo loogu tala galay la dagalaanka Alshabab amarkiisa waxaa si wadajir ah u go’aamiyey madaxweynaha, raysalwasaaraha iyo taliyaha nabadsugida. Waa in la ogaado in xasuuqii xalay Dhuusamareeb ka dhacay uu danbi dagaal yahay.

Dawlada Federaalka ah iyo dadkii ka soo horjeeday Ahlusunna waxay ku faraxsan yihiin xasuuqa loo geystay dhalinyaradii sanadaha badan deegaanka ka ka hortaagnaa Alshabab, iyo xaqiraada lagula kacay hogaankii Ahlusunna. Dawlada Federaalka ah iyadoo heli kara wado waan waan iyo wadahadal ah ayey dagaal iyo colaad ka doorbiday. Waa wado ay sedaxdii sano ee na dhaaftay ku taagnayd.

Hogaanka Ahlusunna maalintii ay tabarta hayeen way tala diideen, waxayse su’aashu tahay inta kale ee maanta weli tabarta haysa, ma haleeli doonaan talo ay xasuuqa iyo xaqiraada ku soo fool leh isaga badbaadiyaan?

Hadalka Cabdiraxmaan Cabdishakuur  Warsame ayaa kusoo aadaya iyadoo dagaal culus  dhexmaray ciidmada kala taabacsan Ahlusunna iyo dowladda  .

Dagaalkan ayaa intiisa badan waxaa la isku adeegsaday qoriga hoobiyaha oo labada dhinacba ay ku garaacayeen dhismayaasha waaweyn ee magaalada, waxaana goobaha burburka badan uu soo gaaray ka mid ah xarumaha Inji, Shiirkole, dhismaha wasaaradda tamarta iyo biyaha, guriga madaxweyne ku xigeenka Galmudug iyo xarumo kale.

Warar Sugan Kala Soco   Awdinle.com