Dowladda Soomaaliya oo War Cusub kasoo saartay Arrimaha doorashooyinka

Wasiirka Arrimaha Gudaha iyo Federaalka Xukuumadda Soomaaliya Gen. Mukhtaar Xuseen Afrax oo caawa shir jaraa’id ku qabtay Xafiiska Ra’iisul Wasaaraha ayaa ka hadlay arrimaha doorashada iyo muranka ka taagan guddiyadii dowladda magacawday ee sida weyn uga soo horjeesteen musharaxiinta Madaxaweynaha.

Wasiir Janeraal Mukhtaar ayaa  caddeeyay in Guddiyada sida loo magacaabay ay yihiin, marxaladaha isku xirka u ah doorashadii lagu heshiiyay uu bilowday, doorashadana waqtigeeda ay ku dhaceyso.

“Guddiyada sida loogu heshiiyay oo loo soo magacaabay waaye, waqtiga loogu tala galay doorashada inay dhaceyso qof kasta oo Soomaali ahna waa u furan tahay inuu u tartamo waxyaabaha looga heshiiyay ka mid tahay, muhiimka waxaa ah in laga ilaaliyo wax carqalad iyo caqabad dhalinayo in doorashada waqtigeeda inay ku dhacdo wax kasta hakinaya oo waqtigeeda ama dariiqa looga heshiiyay ka leexinaya in aad looga fogaado oo la iska ilaaliyo, dowladda waxay diyaar u tahay in waqtigeeda arrintaas ku qabsoonto, guddiga sida loo magacaabo u magacaaban yihiin sida loogu tala galay oo loo heshiiyay waqtiyada waqti walba wixii loogu tala galay inay qabsoomaan ayaa qorshaha uu yahay”ayuu yiri Wasiirka Arrimaha Gudaha.

Musharixiinta Madaxweynaha Soomaaliya ayaa maalin ka hor Warsaxaafadeed ay soo saareen ayaa waxaa ay uga soo horjeesteen Guddiyada loo Magacaabay Arrimaha doorashooyinka, iyaga oo sheegay in Shaqaalaha Dowladda iyo Ciidamada NISA laga soo xulay.