Duqeyn Cusub oo lagu dilay Saraakiil ka tirsan Al-Shabaab

Duqeynta oo aheyd mid diyaaradeed ayaa saacadihii la soo dhaafay waxaa ay ka dhacday  goob 20-km Waqooyi Bari kaga beegan Deegaanka Goobaanle, ee Gobolka Shabeellaha Hoose.

Saraakiil ka tirsan Ciidanka Dowladda ayaa u sheegay Idaacadda Codka Ciidmada Qalabka sida in duqeynta lagu dilay laba Sarkaal oo kamid ahaa Saraakiisha Sar sare ee Al-Shabaab.

Magacayada Saraakiisha duqeynta lagu dilay ayay Saraakiisha Ciidamada Dowladda ku sheegeen, Sheekh  Cabdi Gaab oo ahaa Sarkaalkii Al-Shabaab u qaabilsanaa Maxkamadda,Wanlaweyn, Beled Amiin, Goobaanle iyo Tuulooyinka ku xeeran.

Sidoo kale duqeynta ayaa waxaa la sheegay in lagu dilay Macalin Bilaal, oo ahaa  Madaxii Wacyigelinta Deegaanada Leego, Beled amiin, Goobaanle iyo Buur Heybe.

Al-Shabaab ayaan weli ka hadlin warkaan kasoo yeeray dowladda Soomaaliya, waxaana Mareykanka todobaadkaan uu kordhiyay duqeymaha lala beegsanayo Al-Shabaab.